وجّهت الفنانة اللبنانية القديرة ماجدة الرومي رسالة مؤثرة إلى اللبنانين خلال إحيائها حفلاً على مدرج مدينة دبي للإعلام، حيث قالت: "بيسعدني وبشرّفني وبيسعد مجموعة الموسيقيين اللبنانيين اللي معي اليوم انه نرحب باللإماراتيين والعرب الغاليين الموجودين بيناتنا اليوم وبشكل خاص برحب باللبنانيي الموجودين هون"، وتابعت: "والله اشتقنالكن واشتاقتلكن بيروت، كنت بحب أحملكن أخبار طيبة أو عايدكن بعيد الاستقلال بس إنتوا وأنا منعرف إنو لبنان قراره محتل من العام 1975، 46 سنة ونحن من محتل للتاني لخاين للتالت، ما بتخلص قصصنا".وأضافت: "نحن عم نتعرض لأعنف عملية تجويع وتخويف وتهجير وقتل مجاني، معنوي ومادي وجسدي تعرضله الشعب 46 سنة وبعدنا صامدين". وتساءلت: "إنتوا متغربين؟ لا إنتوا بعدكم ضمن الوطن العربي الأكبر اللي نحن مننتمي إلو وحاملين هويته، نحن ضمن الخليج العربي، يلي بتعنينا سيادته وحريته واستقلاله قد نور عينينا... نحن بالإمارات وشو الإمارات وشو نحن، صار فيها إلنا أهل وناس أكتر من ما في بلبنان، شو أحلى إنو تكونوا بدبي تحوطوا ايديكم بإيدين الناس اللي عم تعلي وتعمر، تحوطوا ايديكم مع ناس كبار بتشجّر الصحراء... شو أشرف من انكم تساندوا شهداء الداخل اللبناني، أهلكم وناسكم، إنتوا السبب لنحن نزمط جوا... أنتوا عساكر بالجيش اللبناني، عم تدافعوا بالثقافة والفنون الجميلة عن لبنان اللي ما منتنازل عن سيادته".واختتمت "الماجدة" حديثها بالقول: "بضم صوتي لصوتكم لنتمنى للإمارات بعيدها الوطني دوام التقدّم والازدهار... الأمن والأمان والاستقرار".

قد يهمك ايضا 

ماجدة الرومي تشعل قصر القبة في أولى حفلات الربيع

نجوى كرم تهنئ ماجدة الرومي بعيد ميلادها