رامي وحيد يُوضِّح أنّه رفض تقديم أشهر دور لـ"محمد رمضان" في السينما

أبدى الفنان المصري رامي وحيد ندمه على رفض تجسيد دور البطولة في فيلم "الألماني" الذي قدمه النجم محمد رمضان في بداية مشواره بأدوار البطولة المطلقة، وحقق نجاحًا كبيرًا وكان سببا في شهرته وانتشاره فنيًا، وقال رامي: "الأرزاق بتاعت ربنا، وكلنا بيبقى عندنا وجهات نظر في اختياراتنا، فيلم الألماني كان مكتوب علشان أنا أعمله، وعلاء الشريف المؤلف نزل معايا بعض الأماكن وعشت معاه كل الأجواء".

وأضاف: "في لحظة قلقت إني أروح لمنطقة البطولة المطلقة، لفيلم شائك، وفي الوقت ده أنا كنت بعمل بطولة جماعية، ولو رجع بيا الزمن أنا مش عارف كنت هعمل إيه"، وتابع: "أنا عندي حالة من الندم بس متوصلش لمنطقة كبيرة، وزي ما في ندم في رضا الحمد لله، ووارد لو أنا كنت عملت الفيلم مكنش حقق النجاح ده، يمكن محمد رمضان ربنا كاتبله ده وعمله بطريقته وشبهه، يمكن معايا كان هياخد شكل مختلف تمامًا"، وعن تغيير جلده مؤخرًا بعد تقديمه عدة أدوار شر في بداية مشواره، قال وحيد: "لما بتوصل للنجاح وربنا يكرمك لازم تختار أدوارك صح، الناس لما تبدأ تعرف شكلك وتحفظ اسمك وتفتكرلك أدوار وجمل في السينما والتلفزيون ويحفظوا اسمك دي بتبقى مسؤولية كبيرة".

وأردف: "هما شغالين عليا في السوشال ميديا بشكل كبير، وبيضحكوني جدا، خصوصا بعض المشاهد في فيلمي حلم العمر وعمر وسلمى"، واستطرد: "حبيت أبعد عن أدوار الشر وده الناس هيلاحظوه جدا لإن الموضوع ده خلاني بعيد شوية لإن كل اللي كان بيتعرض عليا أدوار شر فبقيت عاوز أبعد، علشان كده الحاجات اللي عملتها الفترة الأخيرة قليلة".
وواصل حديثه: "مثال على كده دوري في مسلسل الطوفان، لأول مرة رامي وحيد واحدة تزعقله ويبقى رد فعله هادي ويقولها ليه بتعملي كده، الناس كانت متعودة إني دايما ببدأ بالهجوم في الشخصية الي بلعبها، لكن في الطوفان كان شخص طيب وحنون".

وأكمل الفنان الشاب: "وبعد الطوفان في مسلسل قيد عائلي، طبعا أنا بشكر محمد رجاء ووائل حمدي وشركة فنون مصر اللي إدتني فرص كبيرة ونقلتني نقلة مهمة، وكمان بشكر شركة أوسكار المنتجة لمسلسل سلسال الدم، على النقلة العظيمة وتحويل دور الشر العظيم إلى دور إنساني خطير في الجزء الأخير".
واختتم رامي حديثه قائلًا: "النقلات اللي في آخر 4 سنوات كانت صعبة ومهمة، من الصعب إنه يتعرض عليك أدوار وترفضها لإن هدفك التغيير ويكون عندك وجهة نظر عاوز تقدمها، يارب يكون في الأيام الجاية دي مستوى مميز من الدراما، ودلوقتي أنا أقدر أقدم أي حاجة، لإني قدمت خلاص كل الألوان، دلوقتي الي بيتفرج مش هيبقى عارف أنا هقدم دور إيه، طيب زي الطوفان ولا شرير زي حلم العمر".

قد يهمك ايضا 

يحيى الفخراني يعيد إحياء الملك لير للمرة الأولى في القطاع الخاص

منى زكي تُشارك جمهورها أعباء الدراسة التي تتحمّلها مِن أجل أطفالها